આ અન્વયે, સુરેન્દ્રનગર વન વિભાગ દ્વારા તા. ૨૨/૦૫/૨૦૨૫ થી ૦૫/૦૬/૨૦૨૫ સુધી 'મિશન લાઈફ' કાર્યક્રમ અંતર્ગત એક વિશાળ પ્લાસ્ટિક એકત્રીકરણ અભિયાનનું આયોજન કરવામાં આવ્યું છે. આ કાર્યક્રમનો મુખ્ય હેતુ જંગલ વિસ્તારો, નર્સરીઓ અને તેની આસપાસના વિસ્તારોને પ્લાસ્ટિક મુક્ત બનાવવાનો છે.
અભિયાનના પ્રથમ ચરણમાં, તા. ૨૨/૦૫/૨૦૨૫ થી ૨૫/૦૫/૨૦૨૫ સુધીમાં સુરેન્દ્રનગર વન વિભાગ હેઠળ આવતી વિવિધ રેન્જના કાર્યક્ષેત્રમાં ૨૫ જેટલા પ્લાસ્ટિક એકત્રીકરણ કાર્યક્રમો સફળતાપૂર્વક યોજવામાં આવ્યા છે. આ કાર્યક્રમોમાં સ્થાનિક લોકો, પર્યાવરણ પ્રેમીઓ અને વન વિભાગના કર્મચારીઓએ ઉત્સાહભેર ભાગ લઈ જંગલ વિસ્તારોમાંથી નોંધપાત્ર માત્રામાં પ્લાસ્ટિક કચરો એકત્રિત કર્યો હતો.
સુરેન્દ્રનગર વન વિભાગના અધિકારીઓએ જણાવ્યું હતું કે, આ અભિયાન માત્ર પ્લાસ્ટિક એકત્રિત કરવા પૂરતું સીમિત નથી, પરંતુ લોકોમાં પર્યાવરણ જાગૃતિ કેળવી તેમને ટકાઉ જીવનશૈલી અપનાવવા પ્રેરિત કરવાનો પણ છે. આગામી દિવસોમાં પણ આ અભિયાન ચાલુ રહેશે અને વધુને વધુ લોકોને તેમાં જોડાઈ પર્યાવરણ સંરક્ષણના આ મહાયજ્ઞમાં આહુતિ આપવા અપીલ કરવામાં આવી છે.
