સુરેન્દ્રનગર શહેરના બી ડિવિઝન પોલીસ સ્ટેશન વિસ્તારમાં આવેલી કે.પી. ગર્લ્સ સ્કૂલમાં નીટની પરીક્ષા ચાલી રહી હતી. આ દરમિયાન, દૂરથી આવેલી એક વિદ્યાર્થીનીએ જીન્સ પહેર્યું હોવાથી તેને શાળાના નિયમો અનુસાર પ્રવેશ મેળવવામાં તકલીફ પડી. પરીક્ષાનો સમય નજીક હોવાથી વિદ્યાર્થીની ખૂબ જ ચિંતિત હતી. આ પરિસ્થિતિની જાણ થતાં જ સુરેન્દ્રનગર બી ડિવિઝન પોલીસે તાત્કાલિક મદદ માટે હાથ લંબાવ્યો અને વિદ્યાર્થીની માટે યોગ્ય કપડાંની વ્યવસ્થા કરી આપી, જેના કારણે તે સમયસર પરીક્ષામાં બેસી શકી.
તો બીજી તરફ, ધ્રાંગધ્રા તાલુકાના જવાહર નવોદય વિદ્યાલયમાં નીટની પરીક્ષા આપવા આવેલી બે વિદ્યાર્થીનીઓ પોતાનું ઓળખકાર્ડ ઘરે ભૂલી ગઈ હતી. આના કારણે તેમને પરીક્ષામાં પ્રવેશ મેળવવામાં મુશ્કેલી આવી રહી હતી. આ સમયે, ધ્રાંગધ્રા તાલુકા પોલીસે ત્વરિત કાર્યવાહી કરી અને વિદ્યાર્થીનીઓ માટે ઓનલાઇન આધારકાર્ડ કઢાવી આપ્યા. પોલીસની આ મદદથી બંને વિદ્યાર્થીનીઓ સમયસર પરીક્ષામાં પ્રવેશી શકી અને તેમનું ભવિષ્ય બગડતા બચ્યું.
સુરેન્દ્રનગર અને ધ્રાંગધ્રા પોલીસની આ સંવેદનશીલતા અને ત્વરિત કાર્યવાહીની ચારેબાજુ પ્રશંસા થઈ રહી છે. આ ઘટનાઓ દર્શાવે છે કે પોલીસ માત્ર કાયદો અને વ્યવસ્થા જાળવવા માટે જ નહીં, પરંતુ જરૂરિયાતમંદ નાગરિકોની મદદ માટે પણ હંમેશા તત્પર રહે છે. પોલીસના આ માનવીય અભિગમને લોકોએ ખૂબ જ સરાહ્યો છે.
