આધુનિક ટેકનોલોજીનો ઉપયોગ કરીને ઇન્ટેલિજન્સ, સર્વેલન્સ અને ગુનેગારોને સજા અપાવવાની પ્રક્રિયાને વધુ કાર્યક્ષમ બનાવવાના ઉદ્દેશ્ય સાથે આ પોર્ટલ શરૂ કરવામાં આવ્યા છે. મુખ્યમંત્રીએ આ પ્રસંગે ભારતીય સેનાના ઓપરેશન સિંદુરનો ઉલ્લેખ કરતાં જણાવ્યું હતું કે વડાપ્રધાન નરેન્દ્રભાઈ મોદી અને કેન્દ્રીય ગૃહમંત્રી અમિતભાઈ શાહના નેતૃત્વમાં ટેકનોલોજીના માધ્યમથી નાગરિકોની સેવા, કાયદો અને વ્યવસ્થાની જાળવણી તેમજ દેશની સુરક્ષા સુનિશ્ચિત કરવામાં આવી રહી છે.
મુખ્યમંત્રીશ્રીએ પોલીસ તંત્રને આધુનિક ટેકનોલોજી અને જરૂરી માળખાકીય સુવિધાઓ પૂરી પાડવાની સરકારની પ્રતિબદ્ધતા વ્યક્ત કરી હતી. તેમણે પોલીસ દળના મલ્ટીટાસ્કિંગ એક્શન ફોર્સ દ્વારા વિકસિત અને સુરક્ષિત ગુજરાતના નિર્માણ માટે વિશ્વાસ વ્યક્ત કર્યો હતો. આ નવા પોર્ટલ ગુજરાત પોલીસની ગુનાખોરીને ડામવાની સજ્જતાને વધુ મજબૂત બનાવશે, એમ તેમણે ઉમેર્યું હતું.
