સુરેન્દ્રનગર જિલ્લામાં હીટવેવ એલર્ટ: મનરેગા શ્રમિકોની આરોગ્ય સુરક્ષા માટે તંત્ર સજ્જ:ગરમીમાં શ્રમિકોનું આરોગ્ય જળવાઈ રહે તે માટે સુરેન્દ્રનગર જિલ્લા પંચાયતની વિશેષ પહેલ
સુરેન્દ્રનગર જિલ્લામાં ચાલી રહેલી હીટવેવની ગંભીરતાને ધ્યાનમાં રાખીને જિલ્લા વહીવટી તંત્ર દ્વારા તાત્કાલિક પગલાં લેવામાં આવી રહ્યા છે. જિલ્લા વિકાસ અધિકારી કે. એસ. યાજ્ઞિક અને જિલ્લા ગ્રામ વિકાસ એજન્સીના નિયામક આર.એમ. જાલંધરાની સૂચના અનુસાર, મનરેગા હેઠળ કાર્યરત શ્રમિકોના સ્વાસ્થ્યની સુરક્ષા માટે વિશેષ ઝુંબેશ ચલાવવામાં આવી રહી છે.આ ઝુંબેશ અંતર્ગત, આરોગ્ય વિભાગની ટીમ દ્વારા મનરેગાના વિવિધ કાર્યસ્થળો પર જઈને શ્રમિકોના આરોગ્યની ચકાસણી કરવામાં આવી રહી છે. આ દરમિયાન, શ્રમિકોને હીટસ્ટ્રોકથી બચવા માટે જરૂરી માર્ગદર્શન આપવામાં આવી રહ્યું છે. વધુમાં, તેમને તાત્કાલિક રાહત મળી રહે તે માટે ઓઆરએસ (ઓરલ રિહાઈડ્રેશન સોલ્યુશન)ના પાઉચનું પણ વિતરણ કરવામાં આવ્યું હતું.
આ તકે જિલ્લા વિકાસ અધિકારી યાજ્ઞિકે જણાવ્યું હતું કે, "અમારા શ્રમિકોની સલામતી અમારી પ્રાથમિકતા છે. હીટવેવની સ્થિતિને જોતા, અમે તેમના સ્વાસ્થ્યની કાળજી લેવા માટે તમામ જરૂરી પગલાં ભરી રહ્યા છીએ. આરોગ્ય તપાસ અને ઓ.આર.એસ. વિતરણ એ આ દિશામાં એક મહત્વપૂર્ણ પહેલ છે."
જિલ્લા ગ્રામ વિકાસ એજન્સીના નિયામક જાલંધરાએ ઉમેર્યું હતું કે, "મનરેગાના કામોમાં રોકાયેલા તમામ શ્રમિકોને સમયસર આરોગ્ય સહાય મળી રહે તે માટે અમારી ટીમો સતત કાર્યરત છે. અમે શ્રમિકોને કામના સ્થળે પૂરતું પાણી અને છાંયડાની વ્યવસ્થા પણ સુનિશ્ચિત કરી રહ્યા છીએ."
આ પહેલથી મનરેગાના શ્રમિકોમાં રાહતની લાગણી જોવા મળી રહી છે અને તેઓએ જિલ્લા વહીવટી તંત્રના આ પ્રયાસોની પ્રશંસા કરી હતી. જિલ્લા વહીવટી તંત્ર આગામી દિવસોમાં પણ હીટવેવની પરિસ્થિતિને ધ્યાનમાં રાખીને આવા પગલાં જારી રાખશે.
