ઘટનાની વિગતો અનુસાર, નાયબ કલેકટર શ્રી મકવાણાની ટીમે GJ-3-BW-5702 નંબરની એક પિકઅપ વાહનની તપાસ કરી હતી, જેમાં શંકાસ્પદ બેરલ જોવા મળ્યા હતા. વાહનની ઝીણવટભરી તપાસ કરતાં તેમાંથી LDO ભરેલા કુલ 11 બેરલ મળી આવ્યા હતા. જપ્ત કરવામાં આવેલા આ ડીઝલના જથ્થાની બજાર કિંમત આશરે રૂ. 1,34,992 આંકવામાં આવી છે. આ ઉપરાંત, ગેરકાયદેસર જથ્થો વહન કરતી રૂ. 4 લાખની કિંમતની પિકઅપ વાનને પણ જપ્ત કરવામાં આવી છે.
વાહનના ડ્રાઈવર પાસેથી પ્રાપ્ત થયેલા દસ્તાવેજો અનુસાર, આ જથ્થો બાલાજી એન્ટરપ્રાઈઝના માલિક જયદીપભાઈ રસિકભાઈ વઘાસિયાનો હોવાનું જાણવા મળ્યું છે. તેઓ નારણકા ગામના રહેવાસી છે અને કોટડા સંગાણી તાલુકામાં તેમનો વ્યવસાય ધરાવે છે.
આ કાર્યવાહી ગુજરાત આવશ્યક ચીજવસ્તુ હુકમ 1981ની જોગવાઈઓ હેઠળ કરવામાં આવી છે. આ હુકમ મુજબ, કોઈપણ અધિકૃત વેપારી તેમના લાયસન્સમાં દર્શાવેલા સ્થળ સિવાય અન્ય કોઈ જગ્યાએ આવશ્યક ચીજવસ્તુઓનો સંગ્રહ કે વેચાણ કરી શકે નહીં. આ નિયમનું ઉલ્લંઘન કરવા બદલ કુલ રૂ. 5,34,992 નો મુદ્દામાલ કંડિકા 26 હેઠળ જપ્ત કરવામાં આવ્યો છે. હાલમાં આ સમગ્ર મામલે આગળની કાનૂની કાર્યવાહી હાથ ધરવામાં આવી છે. નાયબ કલેકટરની આ સરાહનીય કામગીરીથી ગેરકાયદેસર પ્રવૃત્તિઓ પર અંકુશ આવશે તેવી આશા વ્યક્ત કરવામાં આવી રહી છે.
