સુરેન્દ્રનગર જિલ્લાના પાટડી તાલુકાના વણોદ ખાતે મિશન મંગલમ યોજના અને પંજાબ નેશનલ બેંકના સંયુક્ત ઉપક્રમે સ્વ-સહાય જૂથો માટે કૃષિ પ્રચાર કાર્યક્રમ યોજાયો હતો.
આ કાર્યક્રમમાં ડિસ્ટ્રીક્ટ એન.આર.એલ.એમ.ના લાઈવલીહુડ મેનેજરશ્રી જશવંતસિંહ ડોડીયા દ્વારા ઉપસ્થિત સખી મંડળની બહેનોને કૃષિ સખી, સ્વ-સહાય જૂથનો ફાયદા અને બહેનો સ્વ-સહાય જૂથ બનાવી કેવી રીતે પગભર થઈ શકે તે વિશે માહિતી આપવામાં આવી હતી. જ્યારે પાટડી તાલુકા લાઈવલીહુડ મેનેજરશ્રી સંજયસિંહ ચાવડા દ્વારા સ્વ-સહાય જૂથની બહેનોને ઉત્સાહિત કરવામાં આવી હતી, અને પંજાબ નેશનલ બેંકનો સહકાર બદલ આભાર વ્યક્ત કરવામાં આવ્યો હતો.
આ પ્રસંગે રાજકોટ ઝોનના પંજાબ નેશનલ બેંકના ચીફ મેનેજરશ્રી રામેશ્વર ગોધારા, એગ્રિકલ્ચર ઓફિસરશ્રી કમલકર પવાર, ડીએલએમશ્રી સુરેન્દ્રનગર, ટીએલએમશ્રી પાટડી અને એપીએમ શ્રીમતી તૃપ્તિબેન આચાર્યના હસ્તે વણોદ ક્લસ્ટરના ૨૬ જેટલા સ્વ-સહાય જૂથના બહેનોને જૂથ દીઠ રૂપિયા ૬ લાખ લેખે રૂપિયા ૧ કરોડ અને ૫૬ લાખના કેશ ક્રેડિટ લોનના મંજૂરી હુકમનું વિતરણ કરવામાં આવ્યું હતું. 
આ પ્રસંગે પંજાબ નેશનલ બેંક-વણોદ શાખાના મેનેજરશ્રી શ્રેષ્ઠ કોહલી દ્વારા પ્રાસંગિક ઉદ્દબોધન કરવામાં આવ્યું હતું. જ્યારે વણોદ ક્લ્સ્ટરના કલ્સ્ટર કોર્ડીનેટરશ્રી કામરનભાઈ દ્વારા આભારવિધી કરવામાં આવી હતી. આ કાર્યક્રમમાં વણોદ ક્લ્સ્ટરના સ્વ-સહાય જૂથોના બહેનો ઉપસ્થિત રહ્યા હતા.
