લીંબડી-અમદાવાદ હાઈવે પર અજાણ્યા આઈશરની ટક્કરથી ખાણ ખનીજ વિભાગના ત્રણ અધિકારી ઘાયલ, ચાલક ફરાર

સુરેન્દ્રનગર જિલ્લાના લીંબડી-અમદાવાદ હાઈવે પર જાખણ ગામ નજીક એક અકસ્માત સર્જાયો હતો. જેમાં એક અજાણ્યા આઈશર ટ્રકના ચાલકે ખાણ અને ખનીજ વિભાગની સરકારી ગાડીને ટક્કર મારી હતી. અકસ્માત બાદ આઈશરનો ચાલક ઘટનાસ્થળેથી નાસી છૂટવામાં સફળ રહ્યો હતો.

આ દુર્ઘટનામાં ખાણ ખનીજ વિભાગના ત્રણ કર્મચારીઓને ઈજાઓ પહોંચી હતી.અકસ્માતની જાણ થતાં જ તાત્કાલિક ધોરણે ઘાયલોને સારવાર માટે લીંબડીની આર.આર. સરકારી હોસ્પિટલમાં ખસેડવામાં આવ્યા હતા.

ઘટનાની જાણ થતાં લીંબડી પોલીસ તાત્કાલિક ઘટનાસ્થળે પહોંચી ગઈ હતી અને તપાસનો ધમધમાટ શરૂ કર્યો હતો. પોલીસ હાલમાં ફરાર આઈશર ચાલકની શોધખોળ કરી રહી છે. પોલીસ આ અકસ્માત સંદર્ભે વધુ તપાસ હાથ ધરી રહી છે.