પ્રાપ્ત માહિતી અનુસાર, એસ.ઓ.જી. સ્ટાફના ASI અનિરૂધ્ધસિંહ મહિપતસિંહ ઝાલાને બાતમી મળી હતી કે, ધ્રાંગધ્રા તાલુકાના એંજાર ગામનો તુષારભાઈ સંજયભાઈ સરદાર (ઉ.વ. ૨૮, મૂળ રહે. રુદપુર, જિ. ઉધમસિંહ નગર, ઉત્તરાખંડ) નામનો યુવક પોતે કોઈ પણ પ્રકારનું તબીબી સારવાર અંગેનું સર્ટીફિકેટ ધરાવતો ન હોવા છતાં સામાન્ય લોકોના માનવ આરોગ્ય સાથે ચેડા કરી, તબીબી પ્રેક્ટિસ કરી રહ્યો છે.
આ બાતમીના આધારે, એસ.ઓ.જી. સુરેન્દ્રનગર સ્ટાફે મેડીકલ ઓફીસર, પી.એચ.સી. કુડાનાઓને સાથે રાખી એંજાર ગામે બાતમીવાળી જગ્યાએ રેઇડ કરી હતી. રેઇડ દરમિયાન આરોપી તુષારભાઈ સંજયભાઈ સરદાર (ક્ષત્રિય રાજપુત) તબીબી પ્રેક્ટિસ કરતા મળી આવ્યો હતો. તેના કબજામાંથી અલગ અલગ કંપનીની રૂ. ૬,૧૯૦.૯૮ ની કિંમતની એલોપેથીક દવાઓ અને અન્ય મુદામાલ મળી આવ્યો હતો.
એસ.ઓ.જી. દ્વારા આ નકલી ડોક્ટર વિરુદ્ધ ધ્રાંગધ્રા તાલુકા પોલીસ સ્ટેશન ખાતે મેડીકલ પ્રેકટીશનર એક્ટ કલમ-૩૦ મુજબ ગુનો રજીસ્ટર કરી આગળની કાયદેસરની કાર્યવાહી હાથ ધરવામાં આવી છે. આ સમગ્ર કામગીરીમાં PI બી.એચ. શીંગરખીયા, PSI એન.એ. રાયમા, PSI આર.જે. ગોહિલ, ASI અનિરૂધ્ધસિંહ મહિપતસિંહ ઝાલા, HC અરવિંદસિંહ દિલુભા, HC ચેહરભાઇ અમરશીભાઇ ઝીઝુવાડીયા, PC બલભદ્રસિંહ નરેન્દ્રસિંહ ઝાલા સહિતના પોલીસ અધિકારીઓ/કર્મચારીઓ રોકાયેલા હતા. આ કડક કાર્યવાહીથી બોગસ ડોકટરોમાં ફફડાટ વ્યાપી ગયો છે.
