વઢવાણ, તા. 09 જૂન, 2025: વિશ્વ હાયપરટેન્શન દિવસના માસિક જનજાગૃતિ અભિયાનના ભાગરૂપે આજે વઢવાણ સામૂહિક આરોગ્ય કેન્દ્ર દ્વારા એક ભવ્ય જનજાગૃતિ રેલીનું આયોજન કરવામાં આવ્યું હતું. આ રેલીનો મુખ્ય ઉદ્દેશ્ય નાગરિકોને હાઈ બ્લડ પ્રેશર (BP) અને ડાયાબિટીસ જેવા ગંભીર રોગો અંગે સચોટ માહિતી પૂરી પાડી, તેમનામાં જાગૃતિ લાવવાનો હતો.
વઢવાણ સામૂહિક આરોગ્ય કેન્દ્રથી શરૂ થયેલી આ રેલી વઢવાણના મુખ્ય માર્ગો પર ફરી હતી. આ રેલીમાં આરોગ્યકર્મીઓ, સ્વયંસેવકો અને મોટી સંખ્યામાં સ્થાનિક નાગરિકો ઉત્સાહભેર જોડાયા હતા. રેલી દરમિયાન, સહભાગીઓએ BP અને ડાયાબિટીસના લક્ષણો, નિવારણના ઉપાયો, અને નિયમિત તપાસના મહત્વ અંગેના પ્લેકાર્ડ્સ અને સૂત્રો દ્વારા લોકોને સંદેશો આપ્યો હતો.
આ પ્રકારના જનજાગૃતિ કાર્યક્રમો દ્વારા નાગરિકોને પોતાના સ્વાસ્થ્ય પ્રત્યે સભાન થવા અને સમયસર નિદાન તથા સારવાર મેળવવા માટે પ્રેરણા મળશે, જેનાથી આ રોગોથી થતા જોખમોને ઘટાડી શકાય છે. વઢવાણ સામૂહિક આરોગ્ય કેન્દ્ર દ્વારા આવા જનહિતકારી કાર્યક્રમો ભવિષ્યમાં પણ યોજવામાં આવશે તેવી લોકોએ આશા વ્યક્ત કરી હતી.
