વઢવાણ ડિવિઝનના ખનન વિભાગે નેશનલ હાઈવે પર વિવિધ સ્થળોએ આકસ્મિક દરોડા પાડી ગેરકાયદે ખનન વહન કરતા વાહનો સામે લાલ આંખ કરી છે. આ ચેકિંગ દરમિયાન વિભાગને મોટી સફળતા મળી છે, જેમાં ગેરકાયદેસર ખનન વહન કરતા ૧૯ ડમ્પર અને એક જેસીબી મશીન સહિત કુલ ૭.૭૩ કરોડ રૂપિયાનો મુદ્દામાલ જપ્ત કરવામાં આવ્યો છે.
આ કાર્યવાહી વઢવાણ તાલુકાના બલદાણા, ફૂલગ્રામ, સિધ્ધસર, શેખપર અને પલાસા સહિતના ગ્રામ્ય વિસ્તારોમાં હાથ ધરવામાં આવી હતી. ચોટીલાના નાયબ કલેકટર એચ.ટી.મકવાણાએ વઢવાણ પ્રાંતનો ચાર્જ સંભાળ્યા બાદ તુરંત જ આ કડક કાર્યવાહી કરી છે, જે ગેરકાયદેસર પ્રવૃત્તિઓ સામે તેમની પ્રતિબદ્ધતા દર્શાવે છે. જપ્ત કરાયેલો તમામ મુદ્દામાલ વઢવાણ અને મુળી મામલતદાર કચેરીએ ખસેડવામાં આવ્યો છે, જ્યાં આગળની કાનૂની કાર્યવાહી હાથ ધરવામાં આવશે. ઉલ્લેખનીય છે કે ચોટીલા બાદ હવે વઢવાણ પંથકમાં પણ ગેરકાયદેસર ખનન વહન સામે કડક કાર્યવાહીનો દોર શરૂ થયો છે, જે આવા કૃત્યો આચરનારાઓ માટે ચેતવણીરૂપ છે.
